ရက်ပေါင်း ၁၀၀ အတွင်း မန်းစည်ပင်ဆောင်ရွက်မယ့် စီမံကိန်းတွေ
ရေပေးဝေရေး
ရက်ပေါင်း ၁၀၀ အတွင်း မန္တလေးမြို့ ရေဂါလန် ငါးသန်းပိုမိုတိုးချဲ့ပေးဝေနိုင်ဖို့ ဆောင်ရွက်မှာဖြစ်တယ်လို့ သိရပါတယ်။
ချမ်းအေးသာစံမြို့နယ်မှာ ရေတွန်းစက်ကြီး တပ်ဆင်တာ ၊ အချင်း ၁၂ လက်မရှိရေတွင်းတူးဖော်တာ ၊ အောင်မြေသာစံမြို့နယ်မှာ ၁၂ လက်မ စက်ရေတွင်းတွေကနေ သက်ဆိုင်ရာ ရေပေးရေးပိုက်လိုင်း ကွန်ရက်အတွင်း ပို့လွှတ်တာ ၊ ရေပေးဝေရေး ပင်မပိုက်လိုင်းကနေ ရေလွှတ်ပိုက်လိုင်းဆက်သွယ်ချထားတာ ၊ ရေတွန်းစက်တပ်ဆင်တာ ၊ ကျုံးရေသွယ်ယူမယ့် ပိုက်လိုင်းချထားတာ ၊ မဟာအောင်မြေမြို့နယ်မှာတူးဖော်ပြီး စက်ရေတွင်းကနေ ရေတွန်းစက်ရုံကို စနစ်တကျပေးပို့နိုင်ဖို့ ပိုက်အသစ်တွေသွယ်တန်းတာတွေ ဆောင်ရွက်မှာဖြစ်ပါတယ်။
ချမ်းမြသာစည်မြို့နယ်မှာ ပိုက်လိုင်းတွေ တိုးချဲ့တပ်ဆင်တာ ၊ ရေစုပ်စက်တပ်ဆင်တာ ၊ ပြည်ကြီးတံခွန်မြို့နယ်မှာ စက်ရေတွင်းအသစ် တူးဖော်တာ ၊ ရေပိုမိုရရှိရေးဆောင်ရွက်တာ ၊ အမရပူရမြိုနယ်မှာ ရေဆိုးထုတ်ပိုက်လိုင်းတွေကို တိုးချဲ့ချထားတာ ၊ ပုသိမ်ကြီးမြို့နယ်မှာ မိလ္လာကန်ကို အေးရိပ်ငြိမ် သုဿာန်မြောက်ဘက်မှာ ပြောင်းလဲတည်ဆောက်တာတွေ ပြုလုပ်မယ်လို့ သိရပါတယ် ။
လမ်းခင်း
အသုံးပြုသူများတဲ့ လမ်းမတွေကို ထပ်ပိုးလွှာခင်းတာ ၊ နိုင်လွန်ကတ္တရာလမ်းခင်းတာတွေ ပြုလုပ်မယ်လို့ သိရပါတယ်။
‘တစ်လမ်းမောင်း သတ်မှတ်ထားတဲ့ ၈၃ လမ်း (၂၆ လမ်းကနေ ၃၅ လမ်းအထိ) ကို နိုင်လွန် ကတ္တရာခင်းမယ်’ လို့ မန္တလေးမြို့တော် စည်ပင်က တွဲဖက်အတွင်းရေးမှူး ဦးသက်နိုင်ထွန်းက ပြောပါတယ်။
အပန်းဖြေဥယျာဉ်
နန်းမြို့ရိုးကျုံးကြား ၊ ၇၅ လမ်းနဲ့ လမ်း ၈၀ ကြားမှာ အပန်းဖြေဥယျာဉ်တစ်ခု အကောင်အထည်ဖော်မှာဖြစ်ပါတယ်။ အပန်းဖြေဥယျာဉ်ကို ထိုင်းနိုင်ငံက ပညာရှင်တွေက ဒီဇိုင်းရေးဆွဲပေးနေတယ်လို့ သိရပါတယ်။
အမှိုက်သိမ်းဆည်းရေး
မန္တလေးမြို့အတွင်းရှိ အမှိုက်တွေ ပိုမိုသိမ်းဆည်းနိုင်အောင် ဆောင်ရွက်မှာ ဖြစ်တယ်လို့ သိရပါတယ် ။ အမှိုက်သိမ်းဆည်းတဲ့ အကြိမ်ရေပိုမိုသိမ်းဆည်းမှာဖြစ်ပြီး ယာဉ်အစီးအရေလည်း တိုးချဲ့ဆောင်ရွက်မယ်လို့ သိရပါတယ်။
Source: The Modern