လုပ်ငန်းဆောင်ရွက်ခြင်းမရှိသော မြေလွတ်မြေရိုင်း ဧကလေးသောင်းကျော်ကို ဧပြီလအတွင်း ပြန်လည်သိမ်းယူမည်
ယခင်အစိုးရမှ ချထားပေးခဲ့သည့် မန္တလေးတိုင်းဒေသကြီးအတွင်းရှိ မြေလွတ်မြေရိုင်း ၄၀၈၉၅ ဒသမ ၃၉ ဧကကို ဧပြီလအတွင်း အစိုးရမှ ပြန်လည်သိမ်းယူသွားမည်ဖြစ်ကြောင်း တိုင်းဒေသကြီးအစိုးရအဖွဲ့ထံမှ သတင်းရရှိသည်။မြေလွတ်မြေရိုင်းဥပဒေ ပုဒ်မ ၂၂ အပိုဒ် ခွဲ (ဂ) အရ မူလခွင့်ပြုကာလထက် ကျော်လွန်သည်အထိ ဖော်ထုတ်လုပ်ကိုင် အသုံးပြုခြင်းမရှိသော မြေလွတ်မြေ နိုင်ငံတော်က ပြန်လည်သိမ်းယူပြီးဖြစ်သည်ဟု မှတ်ယူရမည်ဟု ပါရှိသောကြောင့် အဆိုပါလုပ်ကိုင်ခွင့် ချထားပေးသော်လည်း ဆောင်ရွက်ခြင်းမရှိသည့်အ တွက် သိမ်းယူမည်ဖြစ်ကြောင်း မန္တလေးတိုင်းဒေသကြီး စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၀န်ကြီး ဒေါက်တာစိုးသန်းက ပြောကြားသည်။မြေလွတ်မြေရိုင်းများကို လုပ်ငန်းလုပ်ကိုင် အကောင်အထည်ဖော်ရန် ယခင်အစိုးရလက်ထက်က ၅၈၀၇၂၀ ဒသမ ၉၇ ဧကကို ချထားပေးခဲ့ခြင်း ဖြစ်ကာ ပုဒ်မ ၂၂ အပိုဒ်မ (ဂ) အား ဖောက်ဖျက်ကျူးလွန်သည့် ၄၀၈၉၅ ဒသမ ၃၉ ဧက ကို ပြန်လည်သိမ်းယူမည် ဖြစ်သည်။
အဆိုပါ မြေလွတ်မြေရိုင်းများကို ရယူထားသူများမှာ အခြေခံသာမန်ပြည်သူတစ်ဦး တစ်ယောက်မျှမပါဝင်ဘဲ ရာထူးကြီး အရာထမ်းဝန်ထမ်းများ ရယူထားကြောင်း စုံစမ်းသိရပြီး “ဒီလုပ်ကိုင်ခွင့်ချထားပေးတဲ့ မြေလွတ်မြေရိုင်းတွေကို သတ်မှတ်ကာလ ကျော်လွန်သည်အထိ ဆောင်ရွက်ခြင်းမရှိတာမို့ ဥပဒေအရ အလိုအလျောက် သိမ်းယူပြီးဖြစ်နေပါတယ်။ ဒါပေမဲ့ အကြောင်းတော့ကြားထားပါတယ်။ ကျွန်တော်တို့ အစိုးရသစ်စတက်တဲ့ မေလပိုင်းကတည်းက စတင်ဆောင်ရွက်ခဲ့တာဖြစ်ပြီး ဇူလိုင်လမှာ အားလုံးစစ်ဆေးပြီးပါပြီ။ ဒါပေမဲ့ အခုထပ်ပြီးတော့ စာရင်းကို ပြန်အချော စစ်နေပါတယ်။ မတ်လကုန်အပြီးသတ်ပြီးရင် ဧပြီလမှာ စတင်သိမ်းယူမှုတွေ ပြုလုပ်မှာပါ။ ဒီ၂၀၁၇ ထဲကို ဒီမြေယာကိစ္စအပြီး ဆောင်ရွက်သွားမှာပါ။ ဒီသိမ်းယူတဲ့ မြေယာတွေကို လိုအပ်တဲ့စီမံကိန်းတွေ ဆောင်ရွက်တာမျိုး၊ လယ်ယာဖော်ထုတ်တာမျိုး လုပ်ပါမယ်။ အဓိကကတော့ ကျွန်တော်တို့ နိုင်ငံခြား ရင်းနှီးမြှုပ်နှံမှုတွေလာခဲ့ရင် အစိုးရမှာ ပေးစရာမရှိတော့ဘူး။ ပုံစံအမျိုးမျိုးနဲ့ မြေတွေက တစ်ဦးတစ်ယောက်လက်ထဲကို ရောက်နေတယ်။ အဲဒါကြောင့် ဒါတွေကို ဥပဒေနဲ့အညီ စိစစ်ပြီး ပြန်လည်သိမ်းယူသွားမှာပါ” ဟု ၀န်ကြီးဒေါက်တာစိုးသန်းက ဆိုသည်။
Source: Eleven Media Group
Facebook comments