ဒဂုံမြို့သစ် အိမ်ခြံမြေဈေး ၃၀ ရာခိုင်နှုန်းလောက် ဈေးလျှော့လာကြ
.jpg)
တချို့နေရာတွေမှာ ဈေးအမြင့်ပဲ ရှိနေသေးပေမဲ့ နေရာအများစုမှာတော့ အနိမ့်ဈေးတွေပြောင်းပြီး အရောင်းဈေးခေါ်တာတွေရှိလာတယ်လို့ အကျိုးဆောင်တချို့က ပြောပါတယ် ။ အရင် ၂၀၁၆ နှစ်လယ်ပိုင်းဝန်းကျင်အထိ ကျပ်သိန်း ၁၀၀၀ အထက် ရှိနေသေးတဲ့ မြေကွက်တွေက ကျပ်သိန်း ၆၀၀ ကျော် ၊ သိန်း ၇၀၀ ကျော်သာခေါ်ဈေးဖြစ်နေကြတာလို့ သိရပါတယ် ။
ဝါရင့်အကျိုးဆောင် ဦးမောင်မောင်က ‘မြောက်ဒဂုံမှာဆို အရင်က သိန်း ၂၀၀၀ ကျော် ၊ သိန်း ၃၀၀၀ အထက် တချို့ခြံတွေဆို သိန်း ၄၀၀၀ ကျော်အထိ ဈေးရှိခဲ့တဲ့ U9 တို့လိုနေရာတွေမှာတောင် အတွင်းလမ်းဆိုပေမဲ့ ၆၈ ပေ x ၉၄ ပေ အကွက်ကို တစ်နေ့က သိန်း ၁၄၀၀ နဲ့ဈေးတန်းတင်လာတာ ၊ ဈေးက ၃၅ ရာခိုင်နှုန်းလောက် လျှော့ပြီးဈေးခေါ်လာကြတယ် ၊ တချို့ရပ်ကွက်တွေဆိုပေ ၄၀ x ပေ ၆၀ တောင် ကျပ်သိန်း ၆၀၀ ကျော်ပဲ ဈေးရတော့တယ်’ လို့ပြောပါတယ် ။
ဈေးတန်းတွေကို ပိုင်ရှင်တွေကိုယ်တိုင်ဈေးလျှော့ပြီး အကျိုးဆောင်တွေကို ဈေးပြောင်းပေးတာတွေ ရှိလာတာပါ။ တချို့နေရာတွေမှာ ၄၀ ရာခိုင်နှုန်းလောက်အထိ ဈေးလျော့လာတာတွေ ရှိတယ်လို့ သိရပါတယ် ။
အရောင်းအဝယ်ကတော့ ပုံမှန်ဈေးကွက်ပဲလို့ ပြောပါတယ် ။ ဒဂုံအရှေ့ပိုင်း ၊ ဒဂုံမြောက်ပိုင်း ၊ ဒဂုံတောင်ပိုင်း စတဲ့နေရာတွေက မြေကွက်တွေရဲ့ဈေးတွေက လမ်းမတန်းနေရာတွေကလွဲပြီး ဈေးတွေလျှော့လာကြတယ်လို့ သိရတယ် ။
ဝသုန်အကျိုးဆောင်ဦးမောင်ဝင်းက ‘ဒီတစ်ပတ်ထဲမှာပဲ ပေ ၄၀ x ပေ ၆၀ အိမ်ပါတာကိုတောင် ကျပ်သိန်း ၆၅၀ လောက်နဲ့ ဈေးခေါ်တာ ၆၂၀ နဲ့ဈေးတည့်တယ် ၊ အတွင်းလမ်းမတန်းနေရာမှာတောင် သိန်း ၁၀၅၀ နဲ့ အရောင်းအဝယ်ဖြစ်ခဲ့တယ် ၊ ဝယ်သူတွေစိတ်ဝင်စားအောင် အရင်ကလိုဈေးအမြတ်မတင်ဘဲ ပုံမှန်ရောင်းဈေးနဲ့ ဈေးတန်းပြင်ကြတာ ၊ ဈေးကျတာမဟုတ်ဘူး’ လို့ပြောပါတယ် ။
ဒဂုံအရှေ့ပိုင်းမှာတော့ အရင်က ပေ ၄၀ x ပေ ၆၀ သိန်း ၁၀၀ ကျော်တန်မြေတွေလည်း သိန်း ၆၀ ဝန်းကျင်ပဲ ရှိတယ်လို့ သိရပါတယ် ။
အရင်က သိန်း ၃၀၀ ကျော်တန်တွေက သိန်း ၂၆၀ ဝန်းကျင် လောက်ပဲရှိပြီး တချို့နေရာတွေဆို သိန်း ၁၀၀ ကျော်ပဲရှိတယ်လို့ သိရပါတယ် ။
ဝယ်သူတွေအတွက် ဝယ်ယူသင့်တဲ့ကာလဖြစ်ပြီး နောက်လပွင့်လင်းရာသီတွေမှာ ဈေးပြန်တင်လို့ ရနိုင်တဲ့ နေရာတွေကို ဝယ်ယူထားသင့်တယ်လို့ အကျိုးဆောင်တချို့ကပြောပါတယ် ။
Source: The Kumudra