စစ်ဆေးခံရတဲ့ အထပ်မြင့်အဆောက်အအုံတွေ အထပ်လျှော့ချပြီး ပြန်ဆောက်ခွင့်ပြု
.jpg)
သည်အဆောက်အအုံတွေက နှစ်လနီးပါးကြာတဲ့အထိ တည်ဆောက်ခွင့် ရပ်ဆိုင်းခံထားရတာပါ။မြေပြင်ကွင်းဆင်း စစ်ဆေးမှုကို ဇွန်လ ၂၁ ရက်နေ့က စတင်ပြီး ရက် ၂၀ အကြာမှာ ပြန်လည်ပြုပြင်ရမယ့် အချက်တွေကို ထုတ်ပြန်လိုက်တာ ဖြစ်ပါတယ်။
ရန်ကုန်မြို့တော် စည်ပင်သာယာရေး ကော်မတီက အတွင်းရေးမှူး ဒေါ်လှိုင်ဦးမော်က ‘ရန်ကုန်မြို့တော် စည်ပင်သာယာရေး ကော်မတီ ဥပဒေနဲ့ မကိုက်ညီတဲ့ အချက်တွေကို ပြင်ပေးရတာပါ၊ အနည်းအများကတော့ တည်ဆောက်ထားတဲ့အပေါ် မူတည်ပြီး ဘယ်လိုမှ အဆင်မပြေတဲ့ အချက်တွေကို ပြန်ပြင်ခိုင်းတာဖြစ်တယ်’ လို့ ပြောပါတယ်။
အထပ်မြင့် အဆောက်အအုံ ၁၂လုံးကို စစ်ဆေးတဲ့ ရလဒ်ကို ရန်ကုန်တိုင်းဒေသကြီး အစိုးရအဖွဲ့ကနေ စည်ပင်သာယာရေးကော်မတီဆီ ပေးပို့ပြီး စည်ပင်သာယာက ထုတ်ပြန်တာဖြစ်ပါတယ်။
ပြန်လည်ပြုပြင်ရတဲ့ အချက်တွေက ရေမြောင်းတွေ ရေစီးရေလာကောင်းမွန်ဖို့ ကိုယ့်စရိတ်နဲ့ကိုယ် ဆောင်ရွက်ရန်၊ အမှန်တကယ် ရပ်နားနိုင်မယ့် ကားပါကင်ဒီဇိုင်း ပြန်လည်တင်ပြရန်၊ steel structure ဖြစ်လို့ fire rating (1 hour) အတိုင်း ဖြစ်အောင် ဆောင်ရွက်ရန်၊ ရေဆိုးများအတွက် water treatment ပြုလုပ်ပေးရန်၊ လျှပ်စစ်နဲ့ ပတ်သက်ပြီး ထရန်စဖော်မာနဲ့ switch များ indoor ဆောင်ရွက်မယ့် နေရာတင်ပြရန်၊ ကားပါကင်နဲ့ ညီမျှတဲ့ အခန်းအရေအတွက် လျှော့ချရန် စတဲ့ အချက်တွေ ပါဝင်ပါတယ်။
လူအများ ကျန်းမာရေးနဲ့ ညီညွတ်စွာ နေထိုင်နိုင်ဖို့ သဘာဝလေဝင်လေထွက် ရရှိရန်၊ ကားအတတ်အဆင်း လျှောစောက်များ စံမမီတာ၊ မြေအောက်ရေမြောင်းပေါ်မှာ ဆောက်ထားတာ၊ ရေမြောင်းအရွယ်အစားကို ကိုယ့်သဘောနဲ့ကိုယ်လျှော့ချတည်ဆောက်တာ၊ ၉၀ ဒီဂရီ အချိုးအကွေ့များနဲ့ တည်ဆောက်တာကြောင့် အဆောက်အအုံဒီဇိုင်းကို အစဆုံး ဒီဇိုင်းဆွဲပြီး ပါမစ်ပြန်လျှောက်ရန်၊ ကားပါကင် ဒီဇိုင်း ပြန်လည်တင်ပြရန် စတဲ့ အချက်တွေ ပြန်ပြုပြင်ရမှာ ဖြစ်ပါတယ်။
အထပ်မြင့်နဲ့ ပတ်သက်ပြီး လေကြောင်းညွှန်ကြားရေးဌာန(DCA) ထောက်ခံချက် ပြန်လည်တင်ပြရန်၊ Road Building Ratio နဲ့ မကိုက်ညီတာ၊ YHT က အသစ်အဆိုပြုတဲ့ ရွှေတိဂုံ ကန့်သတ်ဇုန် ပင်လယ်ရေမျက်နှာပြင်အထက် ပေ ၁၉၀မှာ ပါဝင်နေတာနဲ့ ရှေ့လမ်းအကျယ်နဲ့ အထပ်မြင့် မကိုက်ညီတာ၊ ကပ်လျက်နေရာမှာ အထပ်မြင့်အဆောက်အအုံ စီမံချက် သုံးလုံးရှိနေတာကြောင့် အထပ်မြင့် လျှော့ချဖို့ ထုတ်ပြန်ထားပါတယ်။အချို့အဆောက်အအုံတွေကို လက်ရှိပြီးစီးနေတဲ့ အထပ်မှာပဲ ရပ်တန့်ဖို့ ညွှန်ကြားထားပါတယ်။
အထပ်မြင့်အဆောက်အအုံ ၁၂လုံးကို သက်ဆိုင်ရာမြို့နယ်က လွှတ်တော်ကိုယ်စားလှယ်၊ ရပ်မိရပ်ဖ တစ်ဦး၊ မြို့နယ်အုပ်ချုပ်ရေးမှူး၊ မြန်မာနိုင်ငံ အင်ဂျင်နီယာအသင်းက ကိုယ်စားလှယ်၊ ရန်ကုန်မြို့တော် စည်ပင်သာယာရေး ကော်မတီ လမ်းတံတားဌာန၊ အင်ဂျင်နီယာဌာန(အဆောက်အအုံ)၊ ရန်ကုန် လျှပ်စစ်ဓာတ်အား ပေးရေးအဖွဲ့က မြို့နယ်အင်ဂျင်နီယာ၊ မြန်မာနိုင်ငံ ဆောက်လုပ်ရေး လုပ်ငန်းရှင်များအသင်း၊ Urban Environmental ဌာန၊ မီးသတ်ဦးစီးဌာန၊ Geo Tech နဲ့ ပတ်သက်သူ၊ YHT တို့နဲ့ စစ်ဆေးခဲ့တာ ဖြစ်ပါတယ်။
အမြင့်တွေ စစ်ဆေးတာနဲ့ ပတ်သက်ပြီး ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ‘ရန်ကုန်မြို့အတွင်း အထပ်မြင့်အဆောက်အအုံတွေ တည်ဆောက်တာကို ဥပဒေစည်းမျဉ်း စည်းကမ်း မူဘောင်အတွင်း လုံချုံစိတ်ချစွာ လွတ်လွတ်လပ်လပ် ဆောင်ရွက်နိုင်ဖို့ ဖြစ်တယ်’ လို့ ပြောပါတယ်။
ရန်ကုန်မြို့မှာ နောက်ထပ်စစ်ဆေးဖို့ အထပ်မြင့်အဆောက်အအုံ အလုံး ၁၄၀ ကျော် ကျန်ရှိနေပါတယ်။သည်အဆောက်အအုံတွေကို မြို့ပြအင်္ဂါရပ်နဲ့ ကိုက်ညီအောင် အသေးစိတ် ပြန်စိစစ်ဖို့ ရန်ကုန်မြို့တော်စည်ပင်သာယာရေးကော်မတီက မေလ ၂၀ရက်နေ့က ကြေညာချက် ထုတ်ထားပါတယ်။
နောက်ထပ် စစ်ဆေးဖို့ အဆောက်အအုံတွေကို လက်ရှိမှာ စာရွက်စာတမ်း စစစ်နေပြီလို့ သိရပါတယ်။
ရန်ကုန်တိုင်းဒေသကြီး စီမံဘဏ္ဍာဝန်ကြီး ဦးမြင့်သောင်းက ‘ သတ်မှတ်ထားတဲ့ စည်းမျဉ်း သတ်မှတ်ထားတဲ့ အချက်တွေ မီလို့ရှိရင် အမြဲတမ်း ခွင့်ပြုပေးပါတယ်’ လို့ ပြောပါတယ်။
Source: The Modern