သထုံခရိုင်အတွင်း ရက် ၁၀၀ စီမံချက်ဖြင့် ဒေသဖွံ့ဖြိုးရေးလုပ်ငန်းများ ဆောင်ရွက်သွားမည်
သထုံခရိုင် ကျေးလက်ဒေသဖွံ့ဖြိုး တိုးတက်ရေးဦးစီးဌာနမှ ပြည်သူ့ အတွက် ရက် ၁၀၀ အကျိုးပြုလုပ်ငန်း စီမံချက်ဖြင့် သထုံခရိုင်အတွင်း ဒေသ ဖွံ့ဖြိုးရေး အတွက် အဓိကလိုအပ်သည့် လုပ်ငန်းများကို ငွေကျပ် ၁၄၉ သန်း နီးပါးခန့်အသုံးပြုကာ ဆောင်ရွက်သွား မည် ဖြစ်ကြောင်း သိရသည်။
သထုံခရိုင်အတွင်း ဒေသဖွံ့ ဖြိုး ရေးအတွက် လိုအပ်ချက်များစွာရှိနေ သော်လည်း ဦးစားပေးလုပ်ငန်းများ အဖြစ် ရေတွင်းရေကန်တူးဖော်ရေးနှင့် တံတားဆောက်လုပ်ရေး လုပ်ငန်းများကိုသာ ရက်ပေါင်း ၁၀၀ အတွင်း အပြီး သတ်ဆောင်ရွက်နိုင်ရန် စီစဉ်ထားကြောင်း ခရိုင်ကျေးလက်ဒေသ ဖွံ့ဖြိုး တိုးတက်ရေးဦးစီးဌာနမှ ဒုတိယ ညွှန်ကြားရေးမှူး ဦးလှမျိုးဝင်းက ပြောသည်။
“ဒေသဖွံ့ဖြိုးရေးအတွက် လိုအပ်နေတဲ့ ရေ၊မီး၊ လမ်း၊ တံတား စတဲ့လုပ်ငန်း တွေထဲက ရက်ပေါင်း ၁၀၀ အတွင်းမှာ ရေတွင်းရေကန်တူးဖော်ရေးနဲ့ တံတားပြုပြင်ရေး လုပ်ငန်းတွေကို ရတဲ့ဘက်ဂျက် နဲ့ အပြီးဆောင်ရွက် ပေးသွားမယ်။ ဒီနှစ်မှာ ရေရှားပါးတဲ့အတွက် လာမယ့် နှစ်တွေမှာ ရေအခက်အခဲနည်းပါးအောင် ရေတွင်းရေကန် တူးပေးတာဖြစ်ပြီး တံတားတွေဆိုတာကလည်း သွားလာ ရေးအတွက် မရှိမဖြစ်လိုအပ်လို့ပါ” ဟု ၎င်းကပြောသည်။
သထုံခရိုင်အတွင်း ဒေသဖွံ့ ဖြိုးရေး အတွက် ပြည်ထောင်စုအစိုးရ၏ ခွင့်ပြုရန်ပုံငွေကျပ် ၁၄၈ ဒသမ၉၁၅ သန်းဖြင့် ကျိုက်ထိုမြို့နယ်တွင် ပေ ၃၀ တံတား နှစ်စင်း၊ ဘီးလင်းမြို့နယ်တွင် ပေ ၅၀ တံတားတစ်စင်းနှင့် မြေသားရေကန် နှစ်ကန်၊ လက်တူးတွင်းရေတွင်း ငါးတွင်း၊ သထုံမြို့နယ်တွင် ပေ ၂၀ တံတား တစ်စင်းနှင့် ၄၅ ပေ တံတားတစ်စင်း၊ ပေါင်မြို့နယ်တွင် မြေသားရေကန် တစ်ကန်၊ ၁၅ ပေ တံတားနှစ်စင်းနှင့် ၁၆ ပေ တံတားတစ်စင်းတို့ကို ရက် ၁၀၀ အတွင်း အပြီးသတ်ဆောင်ရွက်ပေးသွား မည်ဖြစ်ကြောင်း ခရိုင်ကျေးလက်ဒေသဖွံ့ဖြိုးတိုးတက်ရေး ဦးစီးဌာနမှ သိရသည်။
Source: MOI Webportal Myanmar