တိုက်ခန်းဝယ်သူတွေပါ အာမခံချက်ရှိစေမယ့် တိုက်ခန်းအဆောက်အအုံဆိုင်ရာ ဥပဒေ ထွက်ရှိဖို့ ဆောင်ရွက်နေ

အိမ်ခြံမြေကဏ္ဍမှာ တိုက်ခန်း၊ အဆောက်အအုံဆိုင်ရာ ဥပဒေထွက်ရှိဖို့လိုအပ်နေတာကြောင့် တိုက်ခန်း၊ အိမ်ရာအဆောက်အအုံဆိုင်ရာ  ဥပဒေထွက်ရှိဖို့ ကြိုးပမ်းဆောင်ရွက်နေကြောင်း မြို့ပြနှင့်အိမ်ရာဖွံ့ဖြိုးရေးဦးစီးဌာနညွှန်ကြားရေးမှူးချုပ် ဦးမင်းထိန်က ပြောပါတယ်။ 

အိမ်ရာကဏ္ဍ ဆောင်ရွက်တဲ့ တည်ထောင်သူ၊ တည်ဆောက်သူတွေအပြင်နေထိုင်သူတွေအတွက်ပါ ဆောင်ရွက်သွားမှာဖြစ်တယ်လို့သိရပါတယ်။ အဲသည် ဥပဒေသာထွက်လာရင်တည်ဆောက်သူတွေအတွက်ရော နေထိုင်သူတွေအတွက်ပါအကျိုးရှိပြီး အိမ်ရာကဏ္ဍမှာများစွာအထောက်အပံ့ရလာမှာဖြစ်တယ်။ ဒါ့အပြင် ဆောက်လုပ်ရေးကဏ္ဍအတွက်ပါ အထောက်အပံ့ကောင်းတွေရရှိလာမှာဖြစ်တယ်လို့ သူက ပြောပါတယ်။

အခုဆိုရင် ဥပဒေရဲ့ မူကြမ်းကို မြန်မာနိုင်ငံလိုင်စင်ရ ကန်ထရိုက်တာများအသင်းကပြုစုပြီး ဌာနကိုတင်ပြတယ်၊ ကျွန်တော်တို့အနေနဲ့လဲ လိုအပ်နေတဲ့တိုက်ခန်းအိမ်ရာဥပဒေကြမ်းဟာ လိုအပ်နေတဲ့ ဥပဒေတစ်ခုဖြစ်တဲ့အတွက်ဆွေးနွေးမှုတွေပြုလုပ်သွားမှာပါလို့ ဦးမင်းထိန်က ပြောပါတယ်။ အဲသည် ဥပဒေသာထွက်လာရင် အိမ်ရာကဏ္ဍနဲ့ ပတ်သက်နေတဲ့ဆောက်လုပ်ရေးကဏ္ဍတွေမှာ နိုင်ငံတကာက ရင်းနှီးမြှုပ်နှံမှုတွေများစွာမျှော်လင့်ထားပြီး အခွင့်အလမ်းကောင်းတွေပေါ်ထွက်လာမှာဖြစ်တယ်လို့သိရပါတယ်။

ဥပဒေမထွက်ခင်မှာဆိုရင် လက်ရှိတိုက်ခန်းအိမ်ရာဆောက်လုပ်မှုတွေနဲ့ပတ်သက်ပြီး အခက်အခဲတွေရှိနေပါတယ်။ အဲသည်အခက်အခဲကတော့ အိမ်ရာတည် ဆောက်သူတွေက မြေပိုင်ရှင်တွေနဲ့ အကျိုးတူဆောင်ရွက်တာတွေရှိပြီးနေထိုင်သူတွေအနေနဲ့ ပိုင်ဆိုင်မှုအာမခံချက်မခိုင်မာတာတွေတွေ့ရပါတယ်။ ဥပဒေ ထွက်လာရင်နေထိုင်သူတွေအတွက် အာမခံချက်ရလာမယ်။ အာမခံချက်တွေပေါ်မူတည်ပြီး ဘဏ်စနစ်နဲ့ချိတ်ဆက်ပြီးတော့လည်း ငွေကြေးလိုအပ်ချက်တွေကိုလည်း ဖြည့်ဆည်းပေးသွားနိုင်မှာဖြစ်ပါတယ်လို့ သူက ပြောပါတယ်။

| Share on Facebook | Share on Google Plus | Share on Twitter