တရုတ်- မြန်မာ နယ်စပ် ကုန်သွယ်ရေးတွင် အဓိက အရေးပါသော ရှမ်းပြည်နယ် မြောက်ပိုင်း မူဆယ်မြို့တွင် လေယာဉ်ကွင်း ဖောက်လုပ်သွားမည်ဖြစ်ကြောင်း ပို့ဆောင်ရေးနှင့် ဆက်သွယ်ရေး ဝန်ကြီးဌာန ဒုတိယဝန်ကြီး ဦးကျော်မျိုးက ပြောကြားလိုက်သည်။
အောက်တိုဘာလ ၂၅ ရက်နေ့က ကျင်းပသော ပြည်သူ့လွှတ်တော် အစည်းအဝေးတွင် လှိုင် မဲဆန္ဒနယ်မှ ဦးအောင်ကျော်ကျော်ဦးက မြန်မာနိုင်ငံ၏ အဓိက နယ်စပ်ကုန်သွယ်ရေး မြို့များဖြစ်သည့် မူဆယ်နှင့် မြဝတီမြို့များတွင် လေယာဉ်ကွင်း ဆောက်လုပ်ရန် အစီအစဉ် ရှိ၊ မရှိ မေးမြန်းခဲ့ခြင်းဖြစ်ပြီး ၎င်းက အထက်ပါအတိုင်း ဖြေကြားခဲ့ခြင်းဖြစ်သည်။
မူဆယ်ဒေသနေ ပြည်သူများအနေနှင့် အစိုးရဌာနနှင့် ဆက်စပ်နိုင်ရေး၊ လူမှုရေး၊ ကျန်းမာရေး၊ ပညာရေးနှင့် စီးပွားရေးကိစ္စများ လုပ်ဆောင်ရာတွင် မြို့ကြီးများသို့ လွယ်ကူစွာဖြင့် အချိန်မီ သွားလာဆောင်ရွက်နိုင်ရေးအတွက် ယင်းသို့ ပြုလုပ်ရန် ရည်ရွယ်ထားခြင်းဖြစ်ကြောင်း ၎င်းက ဆိုသည်။
ယင်းအပြင် နိုင်ငံတကာ ခရီးသွားလုပ်ငန်း ဖွံ့ဖြိုးတိုးတက်လာစေရေးအတွက် နယ်စပ် ကုန်သွယ်ရေးကိစ္စများတွင် လေယာဉ်ကွင်းအသစ်ကို အစိုးရနှင့် ပုဂ္ဂလိက ပူးပေါင်း ဆောင်ရွက်သည့် စနစ်ဖြင့် အကောင်အထည်ဖော် ဆောင်ရွက်နိုင်ရန် ပြည်ထောင်စုအစိုးရအဖွဲ့က ခွင့်ပြုထားပြီဖြစ်သောကြောင့် တင်ဒါခေါ်သည့်လုပ်ငန်းများ ဆက်လက် လုပ်ဆောင်တော့မည်ဖြစ်ကြောင်း ဒုဝန်ကြီးက ရှင်းပြခဲ့သည်။
မြဝတီမြို့တွင် လေယာဉ်ကွင်းသစ် တည်ဆောက်မည်ဆိုပါက သက်ဆိုင်ရာ ပညာရှင်များ ပါဝင်သည့်အဖွဲ့ဖြင့် သင့်တော်လုံလောက်သည့် မြေနေရာကို ကွင်းဆင်း ရှာဖွေရွေးချယ်ရန် လိုအပ်မည်ဖြစ်ပြီး လက်ရှိအချိန်အထိ ဖောက်လုပ်ရန် စီစဉ်ထားမှု မရှိသေးကြောင်း ၎င်းက ထပ်လောင်းပြောကြားသည်။
Source: The Voice