တန်ဖိုးနည်းတိုက်ခန်း လျှောက်လွှာများ လာမည့် ရက်သတ္တပတ်အတွင်း ရောင်းချသွားမည်

javascript

မကြာမီရောင်းချတော့မည့် တန်ဖိုးနည်းအိမ်ရာ များအတွက် တိုက်ခန်းဝယ်ယူခွင့် လျှောက်လွှာများကို လာမည့်ရက်သတ္တပတ်အတွင်း ရန်ကုန်နှင့် နေပြည်တော်တွင် ရောင်းချပေး သွားမည်ဖြစ်ကြောင်း ဆောက်လုပ်ရေး ၀န်ကြီးဌာန၊ မြို့ပြနှင့် အိမ်ရာဖွံ့ဖြိုးရေးဦးစီးဌာနမှ ညွှန်ကြားရေးမှူးချုပ် ဦးမင်းထိန်က နိုဝင်ဘာ ၁၅ ရက်တွင် မြန်မာတိုင်း(မ်)ကို ပြောသည်။

ထို့ပြင် ၀ယ်ယူလိုသူများ၏ လိုအပ်ချက်များကိုပါ သိရှိနိုင်ရန်အတွက် သတင်းအချက်အလက် ကောက်ခံသည့် လုပ်ငန်းများကိုပါ တစ်ပါတည်း လုပ်ဆောင်သွားမည်ဟု ၎င်းက ဆိုသည်။

"ရန်ကုန်၊ ဗိုလ်ချုပ်လမ်းက ရုံးမှာနဲ့ နေပြည် တော်မှာ လျှောက်လွှာတွေကိုရောင်းပေးမယ်။ Data result ရအောင်လို့ နိုင်ငံဝန်ထမ်းတွေ က ဘယ်လောက်လျှောက်သလဲ၊ ကုမ္ပဏီဝန်ထမ်းတွေ၊ အငြိမ်းစားဝန်ထမ်းတွေနဲ့ ပြည်သူတွေ ဘယ်လောက်လျှောက်မလဲဆိုတဲီ့အေေ တွေကို စဉ်ဆက်မပြတ် ပြုစုသွားရမှာဖြစ် တယ်။ ၃၀ ရာခိုင်နှုန်းလည်းပြည့်မယ်၊ လစဉ် ပေးဆပ်နိုင်တဲ့သူတွေကိုလည်း ပထမအသုတ် အနေဖြင့် နေရာချထားပေးမှာဖြစ်ပါတယ်။ လာမည့်အပတ် သတင်းစာထဲမှာလည်းထည့်ကြေညာပေးသွားမှာဖြစ်ပါတယ်"ဟု ၎င်းက ပြောသည်။ ဆောက်လုပ်ထားပြီးဖြစ်သည့် ယုဇန၊ ကနောင်၊ ရွှေလင်ပန်း တန်ဖိုးနည်းအိမ်ရာစီမံ ကိန်းများမှ မြို့ပြနှင့် အိမ်ရာဦးစီးဌာနမှ စီမံခန့်ခွဲခွင့်ရှိသည့် အခန်းများကို ယခုလ အတွင်း အပြီးသတ် ရောင်းချသွားမည်ဖြစ်သည်။

ခြောက်ခန်းတွဲလေးထပ်၊ ရှစ်ခန်းတွဲ လေးထပ်အဆောက်အအုံများဖြစ်ပြီး အခန်း တစ်ခန်းလျှင် အကျယ်အ၀န်းပေါ်မူတည်ကာ မြေညီထပ် သိန်း ၁၂၀ နှင့် လေးလွှာ အပေါ် ဆုံးထပ်ကို ကျပ် ၉၈ သိန်း သတ်မှတ်ကာ ရောင်းချသွားမည်ဖြစ်သည်။

ဆောက်လုပ် ပြီးစီးသွားသည့် အခန်းပေါင်း ၂,၂၀၈ ခန်း အနက် ရန်ကုန်တိုင်းဒေသကြီးအစိုးရအဖွဲ့က အခန်းစုစုပေါင်း၏ ၇၀ ရာခိုင်နှုန်း၊ မြို့ပြနှင့် အိမ်ရာဖွံ့ဖြိုးရေးဦးစီးဌာနက အခန်းစုစုပေါင်း ၏ ၃၀ ရာခိုင်နှုန်းကို ခွဲခြားရောင်းချပေးသွား မည်ဖြစ်သည်။ ဆောက်လုပ်ရေးနှင့် အိမ်ရာဖွံ့ဖြိုးရေး ဘဏ်တွင် တိုက်ခန်း တန်ဖိုး၏ ၃၀ ရာခိုင်နှုန်း ပေးသွင်းထားပြီးဖြစ်သည့် အိမ်ရာ စုဆောင်း ငွေစာရင်း ဖွင့်လှစ်ထားသူများကို ဦးစားပေး ရောင်းချသွားမည်ဖြစ်သည့်အတွက် အိမ်ရာစုဆောင်းငွေစာရင်း ဖွင့်လှစ်ထားသူများပါ မြို့ပြနှင့် အိမ်ရာ ဦးစီးဌာနမှ မကြာမီ ရောင်းချ ပေးမည့် တိုက်ခန်းဝယ်ယူခွင့်လျှောက်လွှာများ ကို ပြန်လည် ၀ယ်ယူတင်ပြရန် လိုအပ်သည်။

"တစ်စောင် ၅၀၀ လောက်တော့ ခန့်မှန်း ထားတယ်။ ပုံစံ လေးမျိုးခွဲထားပြီး ဘယ်သူ တွေက ၀ယ်သလဲ ဆိုတာလည်း သိချင်တာ လည်း ပါတယ်။ ၃၀ ရာခိုင်နှုန်းသွင်းထားပြီးတဲ့ လူတွေလည်း လျှောက်လွှာ ပြန်ဝယ်ရမှာ ဖြစ်ပါတယ်။ ၀ယ်ဖို့ လျှောက်တဲ့လူတွေဆီက အိမ်မရှိကြောင်း ထောက်ခံချက်နှင့် ပြန်လည်တင်ပြရမှာဖြစ်တယ်၊ ပုံစံနဲ့ ပြန်တင်ရမှာဖြစ် ပါတယ်"ဟု မြို့ပြနှင့် အိမ်ရာဖွံ့ဖြိုးရေးဦးစီး ဌာနမှ ဒုတိယညွှန်ကြားရေးမှူး ဦးမင်းအောင် အေးက ပြောသည်။

တန်ဖိုးနည်းတိုက်ခန်းများကို ၀ယ်ယူနိုင် ရန်အတွက် ဆောက်လုပ်ရေးနှင့် အိမ်ရာဖွံ့ဖြိုးရေးဘဏ်တွင် အိမ်ရာစုဆောင်းငွေ စာရင်းဖွင့်လှစ်ထားသူပေါင်း ၉,၀၀၀ ကျော်ရှိ နေပြီး တိုက်ခန်းတန်ဖိုး၏ ၃၀ ရာခိုင်နှုန်းကို အပြည့်အ၀ ပေးသွင်းပြီးသူ ၁,၂၀၀ ကျော်ရှိပြီ ဖြစ်သည်။

"၃၀ ရာခိုင်နှုန်းသွင်းရင် ဦးစားပေး ရောင်းမယ်ဆိုလို့လည်း ၃၀ ရာခိုင်နှုန်းကို ဘဏ်မှာ ငွေသွားသွင်းထားပြီးပါပြီ။ အခုမှ လျှောက်လွှာပြန်ရောင်းမယ်ဆိုတော့ သိပ် နားမလည်တော့ဘူး။ တင်တုန်းကလည်း ဘဏ်မှာ စာရွက်စာတမ်းအပြည့်အစုံ တင်ပြ ပြီးဖြစ်ပါတယ်။ ဒီလထဲမှာ ရောင်းပေးမှာလို့ ကြေညာထားတာသိရတဲ့အတွက် အမြန်ဆုံး ရောင်းစေချင်ပါတယ်"ဟု ယုဇန တန်ဖိုးနည်း အိမ်ရာစီမံကိန်းမှ တန်ဖိုးနည်း တိုက်ခန်း ၀ယ်ယူရန်အတွက် ဆောက်လုပ်ရေးနှင့် အိမ်ရာ ဖွံ့ဖြိုးရေးဘဏ်တွင် တိုက်ခန်းတန်ဖိုး၏ ၃၀ ရာခိုင်နှုန်းကို ပေးသွင်းထားသည့် မ၀င်းနန္ဒာမြင့်က ပြောသည်။

Source : The Myanmar Times

Facebook comments