ဒဂုံမြို့သစ် (ဆိပ်ကမ်း) ရှိ တန်ဖိုးနည်းအိမ်ရာမှ အခန်း ၁၀၀၀ ကျော် ရောင်းမည်

javascript

ဒဂုံမြို့သစ် (ဆိပ်ကမ်း) မြို့နယ်တွင် တည်ဆောက်ထားသည့် တန်ဖိုးနည်းအိမ်ရာမှ အခန်းပေါင်း ၁၀၀၀ ကျော်ကို ၂၀၁၈ ခုနှစ်၊ ဇန်နဝါရီလတွင် ရောင်းချမည်ဖြစ်ကြောင်း မြို့ပြနှင့်အိမ်ရာဖွံ့ဖြိုးရေး ဦးစီးဌာနထံမှ သိရသည်။

လက်ရှိ ဒဂုံမြို့သစ် (ဆိပ်ကမ်း) မြို့နယ်ရှိ ယုဇနအပိုင်း ၁ နှင့် ၂ မှ တန်ဖိုးနည်းအိမ်ရာများမှာ တည်ဆောက်ပြီးစီးနေပြီ ဖြစ်သောကြောင့် အသင့်ရောင်းချရန် ရှိနေပြီး ဆောက်လုပ်ရေးနှင့် အိမ်ရာဖွံ့ဖြိုးရေးဘဏ် (CHDB) တွင် တိုက်ခန်းတန်ဖိုး၏ ၃၀ ရာခိုင်နှုန်းအထိ ငွေပြည့်မီသူများကို ရောင်းချပေးသွားမည်ဖြစ်ကြောင်း မြို့ပြနှင့်အိမ်ရာဖွံ့ဖြိုးရေး ဦးစီးဌာနမှ တာဝန်ရှိသူတစ်ဦးက ပြောကြား
သည်။

“အခုလောလောဆယ် အပိုင်း ၁ မှာ တန်ဖိုးနည်းတိုက်ခန်းတွေကို ဌာနကအပြင် ရန်ကုန်တိုင်းအစိုးရကလည်း ရောင်းချဖို့ ကြေညာပေးမယ်။ စက်တင်ဘာလက မဲနှိုက်ပေးတာမှာ ဝယ်ယူခွင့်ရပေမယ့် အခန်းနေရာ မြေညီထပ်မရလို့ မဝယ်တဲ့သူတွေက အခန်းနေရာကို မကြိုက်သေးရင် ကြိုက်တဲ့အထိ စောင့်လို့ရတယ်”ဟု ၎င်းက ဆိုသည်။

ယုဇနအိမ်ရာ စီမံကိန်းအပိုင်း ၁ တွင် ၈ ခန်းတွဲ ၄ ထပ်၊ ၆ ခန်းတွဲ ၄ ထပ်မှ အိမ်ခန်းပေါင်း ၈၆၄ ခန်း၊ အပိုင်း ၂ တွင် ၈ ခန်းတွဲ ၄ ထပ် ၂၈ လုံး၊ ၆ ခန်းတွဲ ၄ ထပ် ၁၂ လုံးမှ အိမ်ခန်းပေါင်း ၁၁၅၂ ခန်း ဆောက်လုပ်ထားပြီး အခန်းတန်ဖိုး ၃၀ ရာခိုင်နှုန်းပြည့်မီသူများကို ရောင်းချပေးသွားမည် ဖြစ်သည်။

လှိုင်သာယာနှင့် ဒဂုံမြို့သစ် (ဆိပ်ကမ်း) မြို့နယ်များတွင် တည်ဆောက်ထားသည့် တန်ဖိုးနည်းအိမ်ရာမှ အခန်းပေါင်း တစ်ထောင်ခန့် မဲနှိုက်ပေးခြင်းကို စက်တင်ဘာ ၂ ရက်တွင် ပြုလုပ်ခဲ့ပြီး နောက်ထပ် အခန်းပေါင်း ၁၀၀၀ ကျော်အတွက် မဲနှိုက်ပေးမည့်ရက်ကို ယခုလတွင် ကြေညာပေးသွားမည်ဖြစ်ကြောင်း မြို့ပြနှင့်အိမ်ရာဖွံ့ဖြိုးရေး ဦးစီးဌာနထံမှ သိရသည်။

ဒဂုံမြို့သစ် (ဆိပ်ကမ်း) မြို့နယ်ရှိ ယုဇနအပိုင်း(၁)၊ (၂) တို့အပြင် ကနောင်အိမ်ရာတို့မှ တည်ဆောက်ပြီးစီးခဲ့သည့် တန်ဖိုးနည်း တိုက်ခန်းများကို ရောင်းချပေးသွားမည်ဖြစ်ပြီး အိမ်ရာဝယ်ယူရန် ဆောက်လုပ်ရေးနှင့် အိမ်ရာဖွံ့ဖြိုးရေးဘဏ် (CHDB) တွင် တိုက်ခန်းတန်ဖိုး၏ ၃၀ ရာခိုင်နှုန်းအထိ ငွေစုဆောင်းထားရှိပြီး ယင်းဘဏ်နှင့်ချိတ်ဆက်ကာ ၁၀ နှစ် အရစ်ကျစနစ်ဖြင့် ဝယ်ယူခွင့်ပြုသွားမည်
ဖြစ်သည်။

Source : The Voice

Facebook comments