မန္တလေးမြို့ရဲ့ အိမ်ခြံမြေအငှားဈေးကွက် ခေါ်ဈေးကောင်းပြီး အငှားသွက်နေ

javascript

မန္တလေးမြို့ရဲ့ အိမ်ခြံမြေအငှားဈေးကွက်ဟာ လတ်တလောမှာ ၀ါကျွတ်ကာလ နီးကပ်လာတာနဲ့အမျှ အငှားသွက် နေပြီး ခေါ်ဈေးတွေကောင်းနေကြောင်း မြို့ခံ အကျိုးဆောင်တချို့က ပြောပါတယ်။
လက်ရှိအနေအထားမှာ မြို့တွင်းမြို့ပြင်အိမ်ခြံမြေ ခေါ်ဈေးနှုန်းထားတွေဟာ အကွက်အကွင်းနဲ့ နေရာကောင်းရင် ကောင်းသလို ငှားရမ်းသူစိတ်ကြိုက် ဈေးဆွဲခေါ်ယူနိုင်တဲ့ အခြေအနေမှာ ရှိနေပါတယ်။ မြို့တွင်းမှာ အဓိက မိန်းလမ်းပေါ် မတင်ဘဲ လမ်းသွယ်တွေထဲမှာတောင် အောက်ထစ် တစ်လကို ကျပ်ခြောက်သိန်းပတ်ချာလည် ခေါ်ဈေးရှိနေပြီး လုပ်ငန်း လုပ်လို့မရနိုင်ဘဲ နေထိုင်လိုဖြစ်ရုံအနေအထားပဲ ရနိုင်ပါလိမ့်မယ်။
ဝါကျွတ်ကာလနီးကပ်လာတဲ့ ထုံးစံအတိုင်းပဲ အငှားဈေးကွက်က သွက်လာပြီး ငှားရမ်းလိုသူတွေအနေနဲ့ ကိုယ်နဲ့ သင့်တော်တဲ့ ဈေးနှုန်းတန်၊ အိမ်အနေအထားနဲ့ အကွက်အကွင်းမျိုးကိုတွေ့ရင် လက်မနှေးဖို့လိုအပ်တယ်လို့ အိမ်ခြံမြေအကျိုး ဆောင်တချို့ ပြောပါတယ်။ မြို့တွင်းအငှားအတွက် ငွေပမာဏကို တစ်လကို ကျပ်ငါးသိန်းလောက်သာသုံးမယ်ဆိုရင် အဲဒီ ဈေးနှုန်းတန်နဲ့ ရှာဖွေဖို့ဆိုတာဟာ တော်တော်ခက်ခဲနိုင်ပါတယ်။
မြို့တွင်းမှာ အဓိကကျတဲ့ လမ်းမတစ်ခုခုပေါ်တင်တာမျိုးဆိုရင် အဆောက်အအုံကောင်းမွန်မှုနဲ့ ကျယ်ဝန်းမှုအပေါ် မူတည်ပြီး တစ်လကို ပျမ်းမျှ ကျပ်သိန်း ၂၀ ကနေ ကျပ်သိန်း ၅၀ အထိ ဈေးခေါ်နေကြတာတွေလည်း ရှိပါတယ်။ အထူးသဖြင့် လုပ်ငန်းလုပ်ကိုင်လိုသူတွေအနေနဲ့ ဒီပမာဏကို သုံးပြီးငှားရမ်းတာတွေ ရှိနေတာကြောင့် အမြင့်တန်းပေါက်ဈေးတွေဟာ ဆက်လက်ခိုင်မာနေဦးမှာပါ။
အိမ်မြေအရောင်းအ၀ယ်ဈေးကွက်က ပြောပလောက်အောင် သွက်လက်ခြင်းမရှိသေးပေမဲ့ အိမ်အငှားဈေးနှုန်းတွေ က တန့်နေခြင်းမရှိဘဲ တစ်နှစ်တစ်ဈေး ဖြစ်နေတာကြောင့် ငှားရမ်းလိုသူတွေအနေနဲ့ နှစ်ရှည်ငှားရမ်းဖို့အတွက် ကြိုးပမ်းကြ ရကြောင်း အကျိုးဆောင်တချို့က ပြောပါတယ်။ ငှားရမ်းမှုက ဈေးကွက်တောင်းဆိုမှု မပြတ်ရှိနေတာကြောင့် နှစ်ရှည်ငှားရမ်း တဲ့အခါ ဈေးနှုန်းကို ပထမနှစ်အတိုင်း တစ်ပြေးတည်းရရင် ကံကောင်းတယ်လို့ ဆိုကြရမှာပါ။ ဒါပေမဲ့ အများစုကတော့ ပထမ နှစ်ရဲ့ ငှားရမ်းခနှုန်းထားအပေါ်မှာ ရာခိုင်နှုန်းအလိုက်တိုးပြီး နောက်နှစ်တွေအတွက် ဈေးနှုန်းသတ်မှတ်ကြတာ များပြားပါ တယ်။
အိမ်ငှားဈေးနှုန်းတွေက မြို့သစ်မှာဆိုရင်ပဲ သာမန်သွပ်မိုး၊ ထရံကာအနေအထားကို တစ်လကို ကျပ် ၅၀,၀၀၀ လောက်ရှိနေပြီး အိမ်အနေအထားက သပ်သပ်ရပ်ရပ်ဆိုရင် ကျပ်တစ်သိန်းလောက်ပေးရဖို့ ရှိနေပါတယ်။ တစ်နှစ်ပြီးရင် တစ်နှစ် ငှားရမ်းနေထိုင်ဖို့ အိမ်ရှာရတဲ့ ဒုက္ခ၊ အိမ်ငှားဈေးနှုန်းတွေ တရိပ်ရိပ်တက်လာတဲ့ အနေအထားတွေကြောင့် ကိုယ် တတ်နိုင်တဲ့ အနေအထားနဲ့မြေကို အပိုင်ဝယ်ယူဖို့ အားထုတ်လာကြရာမှာ ကျပ်သိန်း ရာဂဏန်းရှိတဲ့ အိမ်မြေတွေက ဈေးနှုန်း အမြင့်တန်း အိမ်မြေတွေဌက် အရောင်းအ၀ယ်ပိုလိုက်လာတာဖြစ်ပါတယ်။ အငှားဈေးတွေမြင့်ပြီး ဈေးကွက်တောင်းဆိုမှု မပြတ်ရှိတာကြောင့် မြို့တွင်း အိမ်ခြံမြေတွေအနေနဲ့ အရောင်းအ၀ယ် မသွက်ပေမဲ့ ဈေးကွက်ကို သိပ်မှုစရာမလိုဘူးလို့ အကျိုးဆောင်တချို့က သုံးသပ်ကြပါတယ်။

Source : Myanmar Time

Facebook comments