ဧရာဝတီတိုင်းဒေသကြီး ပုသိမ်မြို့ ဥမ္မာဒန္တီ အငှားအိမ်ရာ စီမံကိန်း တိုက်ခန်းနေထိုင်ခွင့် ရရှိသူများတွင် ကိုယ်ပိုင်အိုးအိမ်ရှိသူများ ပါဝင်နေကြောင်း သိရ

javascript

ဧရာဝတီတိုင်းဒေသကြီး ပုသိမ်မြို့ အမှတ် (၁၄) ရပ်ကွက် အတွင်းရှိ ဥမ္မာဒန္တီ အငှားအိမ်ရာစီမံကိန်းမှ ငှားရမ်းသည့် အခန်းများအား နေထိုင်ရန် လျှောက်ထားပြီး မဲပေါက်၍ နေထိုင်ခွင့်ရသူများ၌ ကိုယ်ပိုင်အိုးအိမ်ရှိသူများ ပါဝင်နေကြောင်း အဆိုပါ တိုက်ခန်းများတွင် နေထိုင်သူများထံမှ သိရသည်။

ဥမ္မာဒန္တီ အငှားအိမ်ရာစီမံကိန်း တိုက်ခန်းများတွင် နေထိုင်ခွင့်ရရှိရန် လျှောက်ထားသူများအား ကိုယ်ပိုင်အိုးအိမ် အမှန်တကယ် မရှိကြောင်း၊ အခြားဝင်ငွေနည်းပြည်သူများ၊ အငြိမ်းစားဝန်ထမ်းများ၊ ကုမ္ပဏီဝန်ထမ်းများအား ရပ်ကွက်အုပ်ချုပ်ရေးမှူး ထောက်ခံချက်နှင့် အစိုးရ၀န်ထမ်းများတွင် သက်ဆိုင်ရာဌာနအကြီးအကဲ၏ ထောက်ခံချက်တို့ဖြင့် လျှောက်ထားခဲ့သော်လည်း ယခုအခါတွင် နေထိုင်ခွင့် ရရှိသူများ၌ ကိုယ်ပိုင်အိုးအိမ်ရှိနေသူများလည်း ပါဝင်နေကြောင်း သိရသည်။

“လျှောက်လွှာ လျှောက်ထားသူတွေမှာ အမှန်တကယ် အိုးအိမ်ရှိ၊ မရှိကို ၀န်ထမ်းဆိုရင် သက်ဆိုင်ရာ ဌာနထောက်ခံချက်၊ ကျန်သူတွေကိုတော့ ရပ်ကွက်အုပ်ချုပ်ရေးမှူးတွေရဲ့ ထောက်ခံချက်နဲ့ ပေးခဲ့တာပါ။ အသေးစိတ်တော့ မစိစစ်ဖြစ်ပါဘူး။ စိစစ်နေရင်လည်း အလုပ်မပြီးတော့ပါဘူး” ဟု မြို့ပြနှင့် အိမ်ရာဖွံ့ဖြိုးရေးဌာနမှ ညွှန်ကြားရေးမှူး ဦးနေမင်းထက်က ပြောကြားသည်။

အငှားအိမ်ရာ စီမံကိန်းအား  စတင်တည်ဆောက်စဉ်က ၁၂၄ ခန်း တည်ဆောက်ခဲ့ရာ ရှစ်ခန်းတွဲ လေးထပ်တိုက်တစ်လုံးမှာ ပြီးစီးရန် ရာခိုင်နှုန်း ၃၀ ကျန်နေသဖြင့် ၉၂ ခန်းကိုသာ စတင် ငှားရမ်းခဲ့ခြင်းဖြစ်ကြောင်း၊ ကျန်ရှိနေသော အခန်းများအား ၂၀၁၇-၂၀၁၈ ဘဏ္ဍာနှစ်တွင် ဆက်လက်တည်ဆောက်ကာ ငှားရမ်းမည်ဖြစ်ကြောင်း သိရသည်။

“အခုအိမ်ရာမှာ မဲပေါက်လို့ လာနေထိုင်တဲ့သူတွေထဲမှာ ကိုယ်ပိုင်အိမ်ရှိပြီး မဲပေါက်လို့ လာနေတဲ့သူ တော်တော်များများရှိတယ်။ တစ်ဦးဆို အိမ်သုံးလုံးလောက် ရှိလျက်သားနဲ့ ၀င်လျှောက်ပြီး နေတဲ့အိမ်ကို ငှားထားခဲ့ပြီး လာနေတယ်လို့ သိရတယ်။ အမှန်တကယ် နေထိုင်ဖို့ အခက်အခဲ ရှိနေတဲ့သူတွေအတွက် အစိုးရရဲ့ လုပ်ဆောင်ချက်မှာ ပြီးပြီးရော ထောက်ခံချက်ပေးနေတဲ့ အုပ်ချုပ်ရေးမှူးတွေကြောင့် အမှန်တကယ် လိုအပ်နေသူတွေ အများကြီး နစ်နာပါတယ်” ဟု ဥမ္မာဒန္တီ အငှားအိမ်ရာတွင် နေထိုင်သူ ဦးမြင့်စိုးက ပြောကြားသည်။

ဥမ္မာဒန္တီ အငှားအိမ်ရာ ငှားရမ်းရန် လျှောက်လွာများ ခေါ်ယူချိန်တွင် အခန်းအရေအတွက်ထက် လျှောက်ထားသူ အရေအတွက်မှာ ငါးဆခန့်ပင် ပိုမိုများပြားခဲ့ကြောင်း၊ ယခုကဲ့သို့ သက်ဆိုင်ရာ အုပ်ချုပ်ရေးမှူးများက စိစစ်မှုမရှိဘဲ ထောက်ခံပေးခဲ့သောကြောင့် အမှန်တကယ် လိုအပ်နေသည့် ၀န်ထမ်းနှင့် ပြည်သူများအတွက် နစ်နာမှုများ ရှိနေကြောင်း၊ နောင်တွင် ဆောက်လက်စငှားရမ်းမည့် အခန်းများတွင် ပိုမိုစိစစ်ရန် လိုအပ်ကြောင်း အငှားအိမ်ရာ လျှောက်ထားခဲ့သူများက ပြောကြားသည်။

ဧရာဝတီတိုင်းဒေသကြီး အတွင်း၌ မအူပင်နှင့် မြောင်းမြမြို့တို့တွင်လည်း လေးခန်းတွဲ လေးထပ်တိုက်နှစ်လုံး တည်ဆောက်နေပြီဖြစ်ကြောင်းနှင့် အငှားအိမ်ရာစီမံကိန်း အနီးတွင်လည်း တန်ဖိုးနည်းအိမ်ရာ အခန်းပေါင်း ၆၇၆ ခန်း တည်ဆောက်နေကြောင်း သိရသည်။

အငှားအိမ်ရာတွင် ငှားရမ်းနေထိုင်ခွင့် ရရှိသူများမှာ မြေညီထပ်တွင် နေထိုင်မည့်သူများအား ဈေးရောင်းချခွင့်မပြုခြင်း၊ နေထိုင်ခွင့် သက်တမ်းမှာ ငါးနှစ်ရှိပြီး သတ်မှတ်စည်းကမ်းများ ဖောက်ဖျက်ပါက နေထိုင်ခွင့်မှ ဖယ်ထုတ်ခွင့်ရှိကြောင်း တိုင်းဒေသကြီး မြို့ပြနှင့် အိမ်ရာဖွံ့ဖြိုးရေးဦးစီဌာနမှ သိရသည်။ 


Source : Eleven Media Group

Facebook comments