ကျပ်သန်းပေါင်း ၂၁၀၀ ကုန်ကျခံ တည်ဆောက်ခဲ့ပြီး ခရီးသည် ၄၀၀ တစ်ပြိုင်နက် အသုံးပြုနိုင်မည့် လားရှိုးလေဆိပ် အဆောက်အအုံသစ် စတင်ဖွင့်လှစ်

javascript

ကျပ်သန်းပေါင်း ၂၁၀၀ ကုန်ကျခံ တည်ဆောက်ခဲ့ပြီး ခရီးသည် ၄၀၀ တစ်ပြိုင်နက် အသုံးပြုနိုင်မည့် လားရှိုးလေဆိပ် အဆောက်အအုံသစ်အား ခရီးသည်များ အသုံးပြုရန် စတင်ဖွင့်လှစ်ခဲ့ကြောင်း လေကြောင်း ပို့ဆောင်ရေးနှင့် ညွှန်ကြားမှု ဦးစီးဌာနမှ သတင်းရရှိသည်။

လက်ရှိတွင် ပြည်တွင်း လေကြောင်းလိုင်း ခြောက်ခုအထိ ဆင်းသက် အသုံးပြုနေပြီဖြစ်သည့် လားရှိုးလေဆိပ်သည် ခရီးသည်များ ၀င်ထွက်သွားလာရန် လုံလောက်မှု မရှိတော့သဖြင့် လေယာဉ်များ ဆိုက်ရောက်သည့် အချိန်တစ်နာရီအတွင်း  အ၀င်ခရီးသည် ၂၀၀ နှင့်အထွက်ခရီးသည် ၂၀၀ တစ်ပြိုင်နက် အသုံးပြုနိုင်မည့် လေဆိပ် အဆောက်အအုံသစ် တိုးချဲ့တည်ဆောက်ခြင်း လုပ်ငန်းအား ၂၀၁၅ ခုနှစ်၊ စက်တင်ဘာ မှစတင်ကာ ဆောင်ရွက်ခဲ့ပြီး ၂၀၁၆ ခုနှစ်၊ ဒီဇင်ဘာတွင် လေဆိပ် အဆောက်အအုံသစ် တည်ဆောက်ခြင်းနှင့် ဆက်စပ်လုပ်ငန်းများ ပြီးစီးခဲ့ကြောင်း သိရသည်။ အဆိုပါ လေဆိပ် အဆောက်အအုံသစ်နှင့် ဆက်စပ်လုပ်ငန်းများ ဆောင်ရွက်သည့် မြေနေရာသည် မူလ လေဆိပ် အဆောက်အအုံ နေရာမှအပ မြေနိမ့်ချိုင့်ဝှမ်း မြေဆွေး မြေပျော့များ ဖြစ်နေသောကြောင့် အဆောက်အအုံများ မတည်ဆောက်မီ မြေသားလုပ်ငန်းများ ဆောင်ရွက်ခဲ့ရကြောင်း သိရသည်။

ယခုတည်ဆောက် ပြီးစီးသည့် လားရှိုးလေဆိပ် အဆောက်အအုံသစ် တည်ဆောက်ခြင်းနှင့် ဆက်စပ် လုပ်ငန်းများအတွက် ၂၀၁၅ - ၂၀၁၆ ဘဏ္ဍာနှစ်တွင် ကျပ်သန်း ၆၀၀ နှင့် ၂၀၁၆ - ၂၀၁၇ ဘဏ္ဍာနှစ်တွင် ကျပ်သန်း ၁၅၀၀ စုစုပေါင်း ကျပ်သန်း ၂၁၀၀ ကုန်ကျခဲ့ကြောင်း သိရသည်။

ရှမ်းပြည်နယ် မြောက်ပိုင်းမြို့တော်ဖြစ်သည့် လားရှိုးမြို့ရှိ လားရှိုး လေယာဉ်ကွင်းသည် ဒုတိယကမ္ဘာစစ် မတိုင်မီကာလက တည်ရှိခဲ့သော လေယာဉ်ကွင်း တစ်ခုဖြစ်ပြီး အောက်ခံကျောက် ရှစ်လက်မပေါ်တွင် ကတ္တရာ လောင်းထားသော လေယာဉ်ကွင်းတစ်ခု ဖြစ်သည်။ ၁၉၅၁ ခုနှစ်တွင် ကျောက်ကတ္တရာခင်း လုပ်ငန်း ဆောင်ရွက်ခဲ့ပြီး မြန်မာ့လေကြောင်းမှ ဒါကိုတာလေယာဉ်များ စတင် ဆင်းသက် အသုံးပြုခဲ့ခြင်း ဖြစ်သည်။ မူလပြေးလမ်း အလျားပေ ၄၅၀၀၊ အကျယ်ပေ ၁၀၀ အား ၁၉၇၀ ပြည့်နှစ်တွင် တောင်ဘက်သို့ ၄၀၀ ပေ ကျောက်ကတ္တရာဖြင့် လည်းကောင်း၊ ပေ ၁၀၀ အား သံကူကွန်ကရစ်ဖြင့် လည်းကောင်း၊ မြောက်ဘက်သို့ ပေ ၂၅၀ အား ကျောက်ကတ္တရာဖြင့် လည်းကောင်း တိုးချဲ့တည်ဆောက်ခဲ့ပြီး စုစုပေါင်း အလျားပေ ၅၂၅၀ အကျယ်ပေ ၁၀၀ ရရှိခဲ့ပြီဖြစ်သည်။ လားရှိုးလေဆိပ် မူလအဆောက်အအုံမှာ ၁၂၀ x ၆၄ ပေ တစ်ထပ်သံကူ ကွန်ကရစ် အဆောက်အအုံဖြစ်ပြီး ၁၉၉၁ ခုနှစ်မှစ၍ မြန်မာ့လေကြောင်း ခရီးစဉ်အတွက် အ၀င်ခရီးသည် လေယာဉ်တစ်စင်း၊ အထွက်ခရီးသည် လေယာဉ်တစ်စင်း အတွက်သာ အသုံးပြုနိုင်ခဲ့ပြီး ခရီးသည်များသည် လေဆိပ်ခြံစည်းရိုး ပြင်ပရှိ Open Shed တွင်ကုန်ပစ္စည်း ချိန်တွယ်ခြင်းနှင့် Air-line Check-in ကိစ္စများ ဆောင်ရွက်ပြီး တစ်ဖာလုံခန့်ဝေးသည့် လေဆိပ် အဆောက်အအုံ နေရာသို့ သွားလာခဲ့ရသည်။ ယခုအခါတွင် ပြည်တွင်း လေကြောင်းလိုင်း ခြောက်ခုအထိ အသုံးပြုနေပြီဖြစ်သည့် လားရှိုးလေဆိပ်သည် ခရီးသည်များအတွက် လုံလောက်မှု မရှိတော့သဖြင့် အ၀င်ခရီးသည် ၂၀၀ နှင့် အထွက်ခရီးသည် ၂၀၀ တစ်ပြိုင်နက် အသုံးပြုနိုင်မည့် ပေ ၂၀၀-ပေ ၈၀ တစ်ထပ်သံကူ ကွန်ကရစ် လေဆိပ်အဆောက်အအုံ တည်ဆောက်ခဲ့ခြင်းဖြစ်သည်။ အဆိုပါ လားရှိုးလေဆိပ် အဆောက်အအုံသစ်အား ၂၀၁၇ ခုနှစ် ဇန်န၀ါရီ ၂၇ ရက်မှစ၍ ခရီးသည်များ အသုံးပြုနိုင်ရန် ဖွင့်လှစ်ပြီးဖြစ်ကြောင်း သတင်းရရှိသည်။


Source : Eleven Media Group

Facebook comments