တန်ဖိုးနည်းအိမ်ခန်း ၂၂၀၀ အနက် ရန်ကုန်တိုင်းဒေသကြီး အစိုးရအဖွဲ့မှ စီမံခန့်ခွဲမည့် အိမ်ခန်း ၁၅၀၀ ကျော်ကို မကြာမီရောင်းချမည်

javascript

အစိုးရသစ်လက်ထက် ရက် ၁၀၀ အတွင်း ဆောက်လုပ်ရေးဝန်ကြီးဌာနမှ တန်ဖိုးနည်း အိမ်ခန်း ၂၂၀၀ ကို အကောင်အထည်ဖော် တည်ဆောက်ခဲ့ကြောင်း၊ အဆိုပါ  အခန်းပေါင်း ၂၂၀၀ အနက်မှ ရန်ကုန်တိုင်းဒေသကြီး အစိုးရအဖွဲ့မှ စီမံခန့်ခွဲမည့် အိမ်ခန်း ၁၅၀၀ ကျော်ကို မကြာမီ ရောင်းချမည်ဖြစ်ကြောင်း ဆောက်လုပ်ရေးဝန်ကြီးဌာနမှ သိရသည်။

အဆိုပါ အခန်းပေါင်း ၂၂၀၀ အနက် ဆောက်လုပ်ရေးဝန်ကြီးဌာန၊ မြို့ပြနှင့် အိမ်ရာဖွံ့ဖြိုးရေးဦးစီးဌာနမှ စီမံခန့်ခွဲသည့် တန်ဖိုးနည်းအိမ်ခန်း ၆၀၀ ကျော်ကို ရောင်းချလျက်ရှိပြီဖြစ်ကြောင်း သိရသည်။

“ရက် ၁၀၀ အတွင်းမှာဖြစ်ပေါ်လာတဲ့ ၂၂၀၀ မှာ ၀န်ကြီးဌာနက စီမံခန့်ခွဲတဲ့ အခန်း ၆၀၀ ကျော်ထဲမှာ သတ်မှတ်ထားတဲ့ စည်းမျဉ်းစည်းကမ်း ကိုက်ညီတဲ့ ပြည်သူတွေကိုချပေးလိုက်ပါတယ်။ အချို့သော ပြည်သူတွေက တိုက်ပုံစံအားဖြင့် အမျိုးမျိုးဖြစ်နေတဲ့အခါ သူတို့နှစ်သက်တဲ့ တိုက်ပုံစံ မတွေ့သေးတဲ့အတွက် တချို့တွေက နောင်ချပေးမယ့်ဟာတွေ ကျမှယူမယ်ဆိုပြီး Cancel လုပ်လိုက်တာတွေလည်း ရှိပါတယ်”ဟု မြို့ပြနှင့်အိမ်ရာ ဖွံ့ဖြိုးရေးဦးစီးဌာနမှ ညွှန်ကြားရေးမှူးချုပ် ဦးမင်းထိန်က ပြောကြားသည်။

“အပိုင်းနှစ်ပိုင်း ဖြစ်သွားတာပေါ့။ ၀န်ကြီးဌာနက စီမံခန့်ခွဲတဲ့တိုက်ခန်းနဲ့ တိုင်းဒေသကြီး အစိုးရက စီမံခန့်ခွဲတဲ့ တိုက်ခန်းတွေကိုလည်း ဆက်လက်ဆောင်ရွက်သွားမယ်။ကျန်ရှိနေတဲ့အခန်းတွေကို တိုင်းဒေသကြီးကို ၁၅၅၂ ခန်း ခွဲဝေပေးထားပါတယ်။ အဲဒီအတွက် တိုင်းဒေသကြီးက စည်းမျဉ်းစည်းကမ်း မူအတိုင်းလုပ်ဖို့ လမ်းညွှန်ထားပါတယ်။ အခုလည်း ညှိနှိုင်းနေပါတယ်။ မကြာခင်မှာ တိုင်းဒေသကြီး အစိုးရအဖွဲ့ရဲ့တိုက်ခန်းတွေ  ဆက်လက် ရောင်းချသွားမှာဖြစ်ပါတယ်”ဟု ဦးမင်းထိန်က ပြောကြားသည်။

ပြည်သူများ၏ အိမ်ရာလိုအပ်ချက်အတွက် တန်ဖိုးနည်းအိမ်ရာစီမံကိန်းများ အကောင်အထည်ဖော်ရန် မြေလိုအပ်ချက်နှင့် ရင်းနှီးမြှုပ်နှံမှုငွေပမာဏ လိုအပ်ချက်ရှိနေကြောင်း၊ သို့သော်လည်း နှစ်အလိုက် အိမ်ရာစီမံကိန်းများ အကောင်အထည်ဖော်ကာ  ပြည်သူများ၏ အိမ်ရာပိုင်ဆိုင်ခွင့်ရရှိရေး ဆောင်ရွက်ပေးသွားမည်ဖြစ်ကြောင်း သိရသည်။

ထို့ကြောင့် ပြည်သူများအနေဖြင့် ဆောက်လုပ်ရေးနှင့် အိမ်ရာဖွံ့ဖြိုးရေးဘဏ်တွင် အိမ်ရာ စုဆောင်းငွေစာရင်း ဖွင့်လှစ်ကာ ငွေစုဆောင်းထားရန်နှင့် စုဆောင်းငွေရာခိုင်နှုန်း  ၃၀ ပြည့်မီသူများအား တန်ဖိုးနည်းတိုက်ခန်းများ ၀ယ်ယူခွင့် ရရှိမည်ဖြစ်ကြောင်း သိရသည်။


Source : Eleven Media Group

Facebook comments